Gürcüstanın baş naziri İrakli Qaribaşvili vəzifəsindən getdiyini açıqlayıb.
“Komanda ilə müzakirə etdiyimiz qərar barədə ictimaiyyəti məlumatlandırmaq istəyirəm. Bu gün mən baş nazir vəzifəsini tərk edirəm”, – o, hökumətin brifinqində deyib.
Bu qərarın səbəblərindən danışan Qaribaşvili qeyd edib ki, ötən ilin sonunda 3 illik fəaliyyəti ilə bağlı hesabat təqdim edib. “Mən çətin dövrdə, daxili, xarici, siyasi, iqtisadi, sosial böhran şəraitində ikinci müddətə hökumət başçısı kimi işləməyə getdim”, – deyən Qaribaşvili əldə olunan nəticələrlə fəxr etdiyini bildirib.
O, həmçinin vurğulayıb ki, hakim Gürcü Arzusu – Demokratik Gürcüstan partiyasında əsas prinsiplərdən biri rotasiyadır. “Komandada çoxlu uğurlu liderlər var və başqalarına da imkan vermək lazımdır. Üstəlik, biz yeni çağırışlarla üzləşirik, yayda yeni parlament seçəcəyik və “Gürcü arzusu” seçkidə inamlı qələbəyə hazırlaşmalıdır”, – Qaribaşvili əlavə edib. (Tass)