Hakim “Gürcü Arzusu” partiyasının baş katibi, Tbilisi meri Kaxa Kaladze ABŞ ilə münasibətlərin yenidən qurulacağına və daha da dərinləşəcəyinə əminliyini ifadə edib.
Gürcüstan parlamentinin xarici agentlər haqqında qanunu qəbul etməsi fonunda Gürcüstanın ABŞ, eləcə də Aİ ilə münasibətləri pozulub. Dövlət Departamenti daha əvvəl qəbul edilmiş qanunla əlaqədar onlarla Gürcüstan vətəndaşına, o cümlədən hökumət, parlament üzvləri və onların qohumları, habelə hüquq-mühafizə orqanlarının əməkdaşlarına qarşı viza sanksiyaları tətbiq etdiyini açıqlamışdı.
“Amerikanın heç bir sanksiyaları yoxdur, Amerikanın dostluğu, strateji tərəfdaşlığı var və bu münasibətlər daha da dərinləşəcək, sıfırlanacaq və daha dostcasına olacaq”, – Kaladze gürcü jurnalistlərə deyib.
Tbilisi meri ölkənin Avropa gələcəyinə də toxunub və qeyd edib ki, “Gürcü arzusu” hakimiyyəti illərində respublika Aİ ilə yaxınlaşma istiqamətində böyük addımlar atıb. “Vurğulamaq istəyirəm ki, bizim yolumuz Avropadır, Avropanın gələcəyidir, Avropaya inteqrasiyadır və bu yolda “Gürcü arzusu” ölkəmizin əhalisi ilə birlikdə böyük qələbə qazanıb Bu yolda şərəflə gedəcəyik, Avropa və Avropa Birliyi adlı ailənin üzvü olacağıq”, – deyə siyasətçi yekunlaşdırıb. (Tass)