Tbilisidə Gürcüstan Yazıçıları Birliyinin (GYB) Azərbaycan bölməsinin dərc etdirdiyi “Körük” adlı ədəbiyyat və sənət jurnalının uzun fasilədən sonra yenidən nəşrinə başlanılıb.
AZƏRTAC xəbər verir ki, M.F.Axundzadə adına Azərbaycan Mədəniyyəti Mərkəzində yeni nəşrin təqdimatı olub.
Mərasimdə GYB-nin Azərbaycan bölməsinin rəhbəri, dərginin baş redaktoru Allahverdi Təkləli, türkiyəli şair Aytekin Karpaça, azərbaycanlı ziyalılar və ictimaiyyət nümayəndələri iştirak ediblər.
Bildirilib ki, Türkiyə Əməkdaşlıq və İnkişaf Agentliyinin (TİKA) dəstəyi ilə işıq üzü görmüş nəşrdə Gürcüstanın azərbaycanlı şair və yazıçıların əsərləri ilə yanaşı, müasir Azərbaycan, gürcü və dünya ədəbiyyatının nümunələri də yer alıb.
A.Təkləli deyib ki, “Körük” jurnalının məqsədi Gürcüstanın azərbaycanlı icmasının ədəbi irsini qoruyub saxlamaq, təbliğ etmək və yeni qələm sahiblərini cəmiyyətə tanıtmaqdır. O, jurnalın yenidən nəşr olunmasına göstərdiyi maddi dəstəyə görə, TİKA-ya təşəkkürünü bildirib, jurnalın iki ayda bir dəfə nəşr olunacağını bildirib.
Sonda tədbir bədii hissə ilə davam edib, aşıq Nargilə Mehtiyeva ifalarını təqdim edib, müxtəlif şeir nümunələr söylənilib.
GYB-nin sədri Bağatur Arabuli AZƏRTAC-a müsahibəsndə deyib ki, bir neçə ilə əvvəl Tbilisidə Azərbaycan və gürcü dillərində “Şəfəq-Sxivi” və “Körük” jurnalları nəşr olunurdu. Sonradan müxtəlif səbəblərdən bu jurnalların nəşri dayandırıldı. Lakin bu gün “Körük” jurnalının yenidən nəşr olunması mühüm əhəmiyyət kəsb edir.