Gəncə şəhərində qızılca xəstəliyinə yoluxma halı ilə bağlı müraciət qeydə alınmayıb. Lakin Göygöl rayonundan iki nəfər Gəncə Şəhər Yoluxucu Xəstəliklər Xəstəxanasına müraciət edib. Biri reanimasiyaya, digər isə palataya yerləşdirilib. Onlardan qan nümunələri götürülərək Bakı şəhərinə Taun Əleyhinə Stansiyaya göndərilib.
Bunu AZƏRTAC-ın bölgə müxbirinə açıqlamasında Gəncə Şəhər Yoluxucu Xəstəliklər Xəstəxanasının Uşaq şöbəsinin infeksionisti, həkim Fəqət Hüseynova deyib.
“Bir neçə gün əvvəl xəstəxanaya müraciət edən Tovuz rayonundan olan bacı-qardaşın qızılca xəstəliyinə yoluxması faktı təsdiqlənib. Vəziyyətləri yaxşı olduğuna görə bir müddət sonra evə buraxılıblar,” – deyə həkim diqqətə çatdırıb.
Həmçinin o, qızılca xəstəliyinin qarşısının alınması məqsədilə Gəncə şəhərində aktiv və passiv peyvəndləmə prosesinin də aparıldığını diqqətə çatdırıb.