Fələstinin radikal HƏMAS hərəkatının hərbi qanadı İzzəddin əl-Qəssam Briqadaları Qəzza şəhərinin qərbində İsrail ordusuna məxsus 3 tankın məhv edildiyini açıqlayıb.
“[İzzəddin] əl-Qəssamın briqadaları “Əl-Yasin-105” mərmilərindən istifadə edərək, Əl-Şati [qaçqınlar] düşərgəsinin kənarında üç sionist tankını, bir zirehli transportyorunu və bir buldozerini məhv edib”, – deyə qrupun mesajında deyilir. Əl-Şati düşərgəsi Qəzzanın qərbində, Aralıq dənizi sahillərində yerləşir.
Çərşənbə axşamı səhər Livanın “Əl Mayadeen” telekanalı Qəzza şəhərinin cənubunda Həmas döyüşçüləri ilə İsrail hərbçiləri arasında şiddətli toqquşmaların baş verdiyini bildirib. Bazar ertəsi İsrailin “Haaretz” qəzeti iddia edib ki, yəhudi dövlət ordusunun quru bölmələri yaxın 48 saat ərzində əhalinin sıx olduğu Qəzza şəhərinə daxil ola bilər. İsrail ordusunun sözçüsü Daniel Hagari noyabrın 5-də bildirib ki, hərbçilər “Qəzza şəhərini mühasirəyə alıblar” (Tass)
