Pentaqonun katibi Pit Heqset orduda və Milli Qvardiyada 120-dən çox yüksək rütbəli zabit vəzifəsini, o cümlədən doqquz yüksək hərbi rütbəni ixtisar etməyi planlaşdırır. Bu barədə Associated Press (AP) məlumat yayıb.
“Daha çox general və admiral daha çox uğur demək deyil. Bu, yüksək rütbəli zabitləri cəzalandırmaq məqsədi daşıyan ixtisar kampaniyası deyil. Bu balanslaşdırılmış proses idi”, – agentlik Heqsetdən sitat gətirir.
AP-nin məlumatına görə, plana əsasən, fəal ordunun təsdiq edilmiş 44 yüksək dərəcəli general və admiral vəzifələrinin 20 faizi, eləcə də 800-dən çox bir, iki və üç ulduzlu general vəzifələrinin 10 faizi ləğv ediləcək. Agentliyin hesablamalarına görə, ixtisarlar digər rəhbər səviyyələrdəki 80 vəzifəyə, o cümlədən Milli Qvardiyanın 33 yüksək vəzifəsinə təsir edəcək.
Onun sözlərinə görə, dəyişikliklər ABŞ prezidenti Donald Trampın administrasiyası tərəfindən irəli sürülən federal agentliklərdə xərclərin və kadrların azaldılması üzrə daha geniş hökumət kampaniyasının bir hissəsidir. İxtisarların məqsədi silahlı qüvvələrin ümumi sayını azaltmaq deyil, yüksək rütbələrin sayını azaltmaq və bu ixtisarları daha aşağı səviyyələrdə əlavə qoşunlarla kompensasiya etməkdir, Heqseth bildirib. (Tass)