İsrail ordusu Qəzza zolağında əlləri qandallı, gözləri bağlı və yarıçılpaq 700-ə yaxın fələstinlini saxlayıb. Görüntülərdə fələstinli kişilərin alt paltarlarına qədər soyunaraq hərbi yük maşınlarına mindirildiyi anları əks olunub. İsrailin qalmaqallı hərəkətinə reaksiya verən Həmas , “Fələstin müqavimətinin əsgər və zabitlərinin vurduğu zərbələr nəticəsində müdafiəsiz mülki vətəndaşlarımızdan qisas almaq üçün onların paltarlarını aşağılayıcı şəkildə çıxarmaq açıq-aşkar sionist cinayətidir” deyib.
Oktyabrın 7-dən Qəzzada qətliamları davam etdirən işğalçı İsrail ordusunun amansızlığı sonsuzdur. İsrailin dövlət televiziyası KAN-ın xəbərinə görə, İsrail ordusu hücumlarını artırdığı Qəzza zolağında təxminən 700 fələstinlini nəzarətə götürüb.
KAN-ın sosial media hesabında paylaşdığı görüntülərdə Qəzza zolağının şimalında dağıntıların ortasında yarıçılpaq və alt paltarında yan-yana düzülmüş və əlləri qandallı onlarla fələstinli görüntülənib. Görüntülərdə gözləri bağlı fələstinli kişilərin sürünərək hərbi yük maşınlarına mindirildiyi əks olunub.