“Heydər Əliyev dərsləri” çərçivəsində növbəti seminar Nəsimi rayonu üzrə keçirilib.
Bu barədə AZƏRTAC-a Baki Şəhəri üzrə Təhsil İdarəsindən məlumat verilib. Bildirilib ki, seminar Dövlət Himninin səsləndirilməsi, Ulu Öndər və Vətən şəhidlərinin əziz xatirəsinin bir dəqiqəlik sükutla yad edilməsi ilə başlayıb.
Yeni Azərbaycan Partiyası (YAP) Nəsimi Rayon Təşkilatının sədri Azər Süleymanov çıxış edərək YAP-ın yaranması, fəaliyyəti və keçdiyi inkişaf yolu barədə danışıb.
BŞTİ-nin YAP ərazi təşkilatının sədri Sevinc Rəsulova “Heydər Əliyev və Azərbaycan təhsilinin inkişaf strategiyası” mövzusunda şagirdlərlə qarşılıqlı müzakirə formatında qurulan interaktiv məruzə ilə çıxış edib. S.Rəsulova Ulu Öndərin Azərbaycan təhsilinin inkişafındakı xidmətlərindən bəhs edərək onun bu istiqamətdə atdığı addımlardan söz açıb. Bildirib ki, Heydər Əliyevin Azərbaycana rəhbərlik etdiyi illərdə elm və təhsil əhatəli quruculuq yoluna qədəm qoyub.
Nəsimi Rayon İcra Hakimiyyəti başçısının müavini Gülarə Verdiyeva Azərbaycanın dünya birliyində artan rolu ilə təhsilin qarşılıqlı əlaqəsindən bəhs edib.
Daha sonra seminar iştirakçıları məktəbliləri maraqlandıran suallara aydınlıq gətiriblər.