Fövqəladə Hallar Nazirliyinin (FHN) Şimal-qərb Regional Mərkəzi tərəfindən “Konstitusiya və Suverenlik İli” çərçivəsində “Heydər Əliyev və milli dövlətçilik təfəkkürü” mövzusunda tədbir təşkil olunub.
Bu barədə AZƏRTAC-a nazirliyin İctimaiyyətlə əlaqə idarəsindən məlumat verilib.
Bildirilib ki, FHN-in Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin təşəbbüsü ilə keçirilən
tədbirdə çıxış edən mərkəzin rəisi polkovnik Ceyhun Babayev Prezident İlham Əliyev tərəfindən 2025-ci ilin “Konstitusiya və Suverenlik İli” elan olunmasını Konstitusiyamıza və dövlət suverenliyinə ali ehtiram və dəyərin ifadəsi kimi dəyərləndirib.
Çıxış edənlər vurğulayı ki, bu gün Azərbaycan dövləti Konstitusiyanın tələblərinə və suveren hüquqlarına əsaslanaraq, qarşıda duran strateji hədəflərə doğru inamla irəliləyir. Tarixin müxtəlif mərhələlərində kənar müdaxilələrə, məhrumiyyətlərə baxmayaraq, xalqımız milli kimliyini, mübarizə ruhunu qoruyub saxlayıb, öz ideallarına həmişə sadiq qalıb və XX əsrin 90-cı illərində dövlət müstəqilliyini bərpa edib. 1993-cü ildə xalqın təkidli tələbi ilə hakimiyyətə qayıdan Ulu Öndər Heydər Əliyevin rəhbərliyi ilə 1995-ci ildə müstəqil Azərbaycanın ilk milli Konstitusiyası hazırlanaraq ümumxalq səsverməsi ilə qəbul olunub. Bu il Konstitusiyanın qəbul edilməsinin 30 ili tamam olur və 2025-ci ilin “Konstitusiya və Suverenlik İli” elan olunması bu baxımdan da əlamətdardır.
Tədbirdə “Konstitusiya və Suverenlik İli” ilə bağlı videoçarx nümayiş olunub.