Hindistan və Pakistanın hakimiyyət orqanları 2024-cü ilin ilk günündə iki ölkədəki nüvə obyektlərinin siyahısını mübadilə ediblər. Hindistan Xarici İşlər Nazirliyinin rəsmi saytında verdiyi məlumata görə , siyahıların ötürülməsi diplomatik kanallar vasitəsilə eyni vaxtda iki qonşu dövlətin paytaxtlarında həyata keçirilib.
“Bu gün Hindistan və Pakistan diplomatik kanallar vasitəsilə eyni vaxtda Yeni Dehli və İslamabadda Hindistan-Pakistan Nüvə Qurğuları və Obyektlərinin Qadağası Sazişinin əhatə etdiyi nüvə qurğuları və obyektlərinin siyahısını mübadilə ediblər”, – bəyanatda deyilir.
Hindistan Xarici İşlər Nazirliyinin qeyd etdiyi kimi, 31 dekabr 1988-ci ildə imzalanmış və 27 yanvar 1991-ci ildə qüvvəyə minmiş saziş, digər məsələlərlə yanaşı, Hindistan və Pakistanın bu sazişin əhatə etdiyi nüvə qurğuları və obyektləri barədə bir-birini məlumatlandırmasını təmin edir. Bu, iki ölkə arasında 33-cü belə siyahı mübadiləsidir.
Bu tədbir Cənubi Asiyada təhlükəsizliyin qorunmasında ən vacib tədbirlərdən biri hesab olunur. İlk belə mübadilə 1 yanvar 1992-ci ildə baş verdi. (Tass)
