Hindistanın Müdafiə Tədqiqatları və İnkişafı Təşkilatı (DRDO) yerli istehsal etdiyi Uzun Menzilli Quru Hücum Kruiz Raketinin (LRLACM) ilk uçuş sınağını uğurla həyata keçirib. Bu barədə Hindistan Müdafiə Nazirliyi məlumat yayıb.
Buraxılış çərşənbə axşamı Odişa sahillərindəki Çandipur Raket Sınaq Poliqonunda mobil buraxılış qurğusundan həyata keçirilib. “Raket qabaqcıl imkanlarını nümayiş etdirdi. Sınaq zamanı bütün LRLACM sistemləri normal rejimdə işlədi və buraxılış məqsədləri üçün uyğun idi”, – Müdafiə Nazirliyinin açıqlamasında deyilir. O da qeyd olunur ki, müxtəlif sürət və yüksəkliklərdə mürəkkəb manevrlər yerinə yetirən raketin uçuşu radarlar və optik-elektron izləmə sistemləri vasitəsilə izlənilib.
Müdafiə naziri Rajnath Singh DRDO-nu raketin buraxılışı münasibətilə təbrik edib və bildirib ki, “LRLACM-nin uğurlu sınağı Hindistanın müdafiə qabiliyyətinin inkişafında əsas mərhələ olub və gələcək uzun mənzilli qanadlı raket proqramlarını asanlaşdıracaq”.
LRLACM mobil yerüstü buraxılış qurğularından və Hərbi Dəniz Qüvvələri gəmilərinin şaquli universal buraxılış modullarından buraxılmaq üçün nəzərdə tutulmuşdur. (Tass)