Livanın şiə partiyası Hizbullah Yəhya Sinvarın Fələstin HƏMAS hərəkatının lideri seçilməsini alqışlayıb və bu qərarı İsrailə güclü mesaj kimi qiymətləndirib. Bu barədə Telegram-kanalında yerləşdirilən məlumatda deyilir.
“Mühasirəyə alınmış Qəzza zolağının səngərlərində olan Sinvarın HƏMAS-ın siyasi bürosunun rəhbəri seçilməsi İsrailin Fələstin müqavimət qüvvələrinin rəhbərliyinin başını kəsmək planlarının iflasa uğradığını göstərir”, mətndə vurğulanır.
Hizbullah bu qərarı “Sionist düşmənə və onun arxasında duran Birləşmiş Ştatlara, HƏMAS-ın qurbanlara baxmayaraq, böyük seçimində vahid və möhkəm qaldığına dair güclü siqnal kimi” görür.
Bəyanatda deyilir ki, Hizbullah və müttəfiqləri “Fələstin xalqını dəstəkləmək və onun işğaldan azad edilməsi üçün bütün cəbhələrdə qəhrəmancasına döyüşü davam etdirəcəklər”.