“Bakı Mərmər Qranit” MMC 2008-ci ildən yaradılıb və 2008-ci ildən 2021-ci ilə kimi fəaliyyət göstərib. Fəaliyyət dövründə geniş layihələri əks etdirib.
AZƏRTAC xəbər verir ki, bu fikirləri jurnalistlərə “Bakı Mərmər Qranit” MMC-nin icraçı direktoru Müşfiq İbadov söyləyib.
Onun sözlərinə görə, pandemiya dövründən sonra müəssisənin fəaliyyəti dayandırılıb və sonra Prezident İlham Əliyevin dekabrın 30-u 2022-ci il tarixli Sərəncamı əsasında müəssisə özəlləşməyə çıxarılıb.
M.İbadov bildirib ki, “Bakı Mərmər Qranit” MMC özəlləşməyə çıxarıldığı halda İqtisadiyyat Nazirliyinin nəzdində Əmlak Məsələləri Dövlət Komitəsindən müəssisəyə maliyyə yardımı təyin olunub: “Müəssisə tam dayanıqlı şəkildə olmadığı üçün iki ay ərzində müəssisədə analiz aparılıb və müəyyən avadanlıqların bərpası üzərində işlər gedir. 2 ay ərzində 45 işçi işə götürülüb. Gələcəkdə işçilərin sayının 220-yə çatdırılması nəzərdə tutulub. Müəssisədə 220 işçi fəaliyyət göstərdiyi zaman aylıq daş həcmini 20 min kuba çatdırmaq mümkün olacaq”.
İcraçı direktorun sözlərinə görə, hazırda işğaldan azad olunan Qarabağ bölgəsində aparılan abadlıq-quruculuq işləri ilə bağlı müəssisənin də bir neçə layihədə iştirakı gözlənilir.