Türkiyənin “Baykar” şirkəti Ukraynada dron istehsalı zavodunun tikintisini 1,5 il ərzində başa çatdırmağı gözləyir. Bu barədə şirkətin baş direktoru Haluk Bayraktar Kiyevdə keçirilən hərbi sənaye forumunda bildirib.
“Tikinti artıq başlayıb. Onu başa çatdırmaq üçün təqribən 1,5 il vaxt lazımdır. Biz burada ən azı 300 nəfərin işləməsini planlaşdırırıq”, – Ukrinform agentliyi ondan sitat gətirir. Eyni zamanda, o, zavodun işə salınması ilə bağlı problemlərin tədarük zəncirinin təmin edilməsi və döyüş şəraitində kadrların tapılması olacağını bildirib.
Baş direktorun sözlərinə görə, şirkət ölkəyə təqribən 100 milyon dollar sərmayə qoyacaq.Bu vəsait zavodun tikintisi ilə yanaşı, xidmət mərkəzinin və şirkətin Ukraynadakı baş ofisinin saxlanmasına sərf olunacaq. (Tass)