III Şuşa Qlobal Media Forumu çərçivəsində “Sosial şəbəkələrin təkamülü ictimai etimada necə təsir edir: KİV və media savadlılığının sərhədləri” mövzusunda panel sessiyası keçirilib.
“Report”un əməkdaşı xəbər verir ki, müzakirədə “LinkedIn”, “TikTok”, “Google” və “YouTube” daxil olmaqla aparıcı qlobal rəqəmsal platformalarının nümayəndələri və ekspertləri iştirak ediblər.
Müzakirə media istehlakının cari tendensiyalarının, məlumatla qarşılıqlı əlaqə modellərinin dəyişməsinin, həmçinin rəqəmsal səs-küy dövründə cəmiyyətin qarşılaşdığı çağırışların dərin təhlili üçün bir məkan olub.
Panel iştirakçıları alqoritmlərin ictimai rəyin formalaşmasına təsirini, yanlış məlumatların yayılması ilə bağlı riskləri ətraflı nəzərdən keçirib, həmçinin tənqidi düşüncə və media savadlılığının inkişafının vacibliyini vurğulayıblar.
“TikTok”un Rusiya, Şərqi Avropa, Mərkəzi Asiya və Monqolustan üzrə dövlət siyasəti və ictimai məsələlər departamentinin direktoru Sergey Sokolov platformanın regionda inkişafı ilə bağlı baxışlarını bölüşüb, “TikTok”un formalaşması, strateji prioritetləri və auditoriyasının sürətli artımı haqqında danışıb. Onun sözlərinə görə, “TikTok”un populyarlığı formatın əlçatanlığı, özünüifadə imkanı və yaradıcı kontent yaratmaq üçün geniş alətlər dəsti ilə şərtlənir.
S.Sokolov jurnalistlərə və media mütəxəssislərinə müraciət edərək yaradıcılıq, həqiqilik, nəşrlərin müntəzəmliyi və kontentin qısa video formatına uyğunlaşdırılması kimi əsas aspektlərə diqqət yetirməyi tövsiyə edib. Onun fikrincə, məhz bu amillər auditoriyanın davamlı cəlb olunmasını təmin edir və istifadəçilərin etimadını qazanmağa kömək edir.
Sunshine Coast Universitetinin (UniSC) ictimaiyyətlə əlaqələr üzrə baş müəllimi, sosial media təlimçisi və tədqiqatçı Karen Sazerlend qeyd edib ki, jurnalistlərin bir hissəsi hələ də yüksək peşə standartlarına riayət edir və məlumatları diqqətlə yoxlayır. Onun sözlərinə görə, lakin tez populyarlıq qazanmaq üçün yoxlanılmamış məlumatları yaymağı üstün tutanlar da var: “Texnoloji tərəqqiyə baxmayaraq, yoxlanılmamış kontenti tam filtrdən keçirməyə mane olan boşluqlar qalır”.
“LinkedIn”in EMEA və LATAM regionları üzrə dövlət sektoru, səhiyyə və qeyri-kommersiya sektorunda satış şöbəsinin rəhbəri Şeymus Klensi öz çıxışında vurğulayıb ki, “LinkedIn” sadəcə sosial şəbəkə deyil, ilk növbədə karyera artımına, işgüzar əlaqələrə və ekspert bilikləri mübadiləsinə yönəlmiş peşəkar platformadır.
O, “LinkedIn”in məşğulluq, peşəkar inkişaf və şəxsi brend yaratma sahəsindəki imkanları haqqında danışıb. Onun sözlərinə görə, platforma qlobal mütəxəssislər cəmiyyətinə çıxış təmin edir və təşkilatlara lazımi kadrları tapmağa kömək edir.