Ötən il İqtisadi İslahatların Təhlili və Kommunikasiya Mərkəzinin (İİTKM) operatoru olduğu “Azexport” portalının Türkiyə, Rusiya və Özbəkistanın məşhur onlayn ticarət platformaları – “Trendyol”, “Ozon” və “Uzum” ilə inteqrasiyası başa çatıb.
“Report” xəbər verir ki, bunu Mərkəzin icraçı direktoru Vüsal Qasımlı bildirib.
Onun sözlərinə görə, 2024-cü ildə “Azexport” portalı ixracatçılara 61 ədəd Sərbəst satış sertifikatı (Certificate of Free Sale) təqdim edib.
“Bu sertifikatlar ixracatçıların məhsullarını xarici bazarlarda sərbəst şəkildə satmalarına şərait yaradıb və onların beynəlxalq bazarlara çıxışını asanlaşdırıb. “Azexport” portalı, həmçinin yerli istehsalçıların xarici müştərilərlə birbaşa əlaqə qurmasına imkan yaradan əsas vasitələrdən biri kimi, 2024-cü ildə Azərbaycanın qeyri-neft ixracının artımında mühüm rol oynayıb”, – deyə V. Qasımlı qeyd edib.
O vurğulayıb ki, “Azexport”un beynəlxalq platformalarla inteqrasiyası nəticəsində daha çox Azərbaycan məhsulunun dünya bazarlarında təqdim edilməsi təmin olunub: “Bu, Azərbaycanın qeyri-neft ixracının güclənməsinə və ixracatçıların rəqabət qabiliyyətinin artırılmasına mühüm töhfə verib”.
V. Qasımlı vurğulayıb ki, portalın fəaliyyətinin genişləndirilməsi, ixrac əməliyyatlarının sadələşdirilməsi və yeni bazarlara çıxış imkanlarının təmin edilməsi Azərbaycanın qeyri-neft ixracının inkişafına əhəmiyyətli dərəcədə təsir göstərib.