Türkologiya Tələbələri Assosiasiyası (ADET) İNALCO-nun Avrasiya bölməsinin bakalavr pilləsindən doktorantura səviyyəsinə qədər türkdilli tələbələri təmsil edir. Assosiasiya “Türk Mədəniyyəti və Dili Günü” münasibəti ilə hər il tədbir təşkil edir.
Bu fikirləri ADET-in prezidenti və İNALCO-nun beynəlxalq əlaqələr fakültəsinin 2-ci kursunda təhsil alan türk tələbə Gizem Dağ AZƏRTAC-a müsahibəsində deyib. O bildirib ki, assosiasiyanın məqsədi türk dilli ölkələrin tarixi, mədəniyyəti, milli geyimi və qastronomiyasını təqdim etmək və onu Parisdə yerli və xarici tələbələrə tanıtmaqdır.
“Bu gün bütün türkdilli ölkələrin mədəniyyəti burada nümayiş olunur. Bəzi fərqlər olsa da, oxşarlıq daha çoxdur. Mədəniyyətlərimiz çox yaxındır. Tariximizi, mədəniyyətimizi, milli geyimlərimizi və qastronomiyamızı təqdim etmək üçün bir fürsətdir. Tələbələr və ictimaiyyətin nümayəndələrindən ibarət olan ziyarətçilərimiz hər bir türk xalqının mədəniyyəti ilə maraqlanırlar. Onları maraqlandıran sualları ətraflı cavablandırırıq. Bu türk mədəniyyətini daha yaxından tanımağa yardım edir”,- deyə G.Dağ türkdilli ölkələrin mədəniyyəti ilə maraqlananların sayının çox olduğunu bildirib. Dağ əlavə edib ki, gün ərzində hər bir türk xalqının milli rəqsi, musiqisi təqdim olunur.