İran hakimiyyəti diplomatik kanallar vasitəsilə ABŞ-ı məlumatlandırıb ki, onlar Fələstin-İsrail münaqişəsinin qızışmasını istəmirlər. Bu barədə İslam Respublikasının xarici işlər naziri Hüseyn Əmir Abdullahiyan bildirib.
“ABŞ-a cavab olaraq bildirdik ki, İran müharibənin yayılmasını istəmir, lakin ABŞ və İsrailin bölgədə tutduğu yanaşmaya görə Qəzza və İordan çayının qərb sahili sakinlərinə qarşı cinayətlər dayanmasa daha geniş münaqişə qaçılmaz ola bilər”, o, Britaniyanın “Financial Times” qəzetinə müsahibəsində bildirib.
“Son 40 gün ərzində İran və ABŞ İsveçrənin Tehrandakı səfirliyinin Amerika şöbəsi vasitəsilə mesaj mübadiləsi aparıblar”, – Abdullahiyan deyib. FT-nin məlumatına görə, o, Tehran və Vaşinqton arasında birbaşa danışıqların mümkünlüyünü istisna edib.
Bundan əvvəl İranın BMT-dəki daimi nümayəndəliyi Reuters agentliyinə bildirib ki, yəhudi dövləti İslam Respublikasına hücum etməyənə qədər Tehran İsraillə birbaşa münaqişəyə girməyəcək. (Tass)