İran Parlamentinin Milli Təhlükəsizlik və Xarici Siyasət Komissiyasının rəhbəri İbrahim Əzizi Hörmüz boğazında gəmi hərəkətini idarə etmək üçün yeni tranzit mexanizminin hazırlandığını və tezliklə təqdim ediləcəyini açıqladı. Əzizi bildirib ki, bu tənzimləmədən yalnız İranla əməkdaşlıq edən ticarət gəmiləri və tərəflər faydalana biləcəklər. O, həmçinin mexanizm çərçivəsində təklif olunan xüsusi xidmətlər üçün ödənişlərin alınacağını da qeyd edib.
İran dövlət televiziyası Avropa ölkələrinin Hörmüz boğazından gəmilərin keçməsi ilə bağlı Tehranla danışıqlar apardığını açıqladı. Dövlət televiziyasının verdiyi xəbərdə deyilirdi: “Şərqi Asiya ölkələrinə, xüsusən də Çin, Yaponiya və Pakistana məxsus gəmilərin keçməsindən sonra bu gün Avropa ölkələrinin də İnqilab Keşikçiləri donanması ilə keçid üçün icazə almaq üçün danışıqlara başladığı barədə məlumat aldıq”. Məlumatda hansı ölkələrin adı çəkildiyi dəqiqləşdirilməyib.