İslam respublikasının mövcudluğu üçün təhlükə yaranarsa, İran nüvə doktrinasına yenidən baxacaq. Bu bəyanatla ölkənin ruhani lideri Ayətullah Əli Xamneyinin müşaviri və İranın Beynəlxalq Əlaqələr üzrə Strateji Şurasının rəhbəri Kamal Xarazi çıxış edib.
“Bizim nüvə bombası yaratmaq qərarımız yoxdur, lakin İranın varlığına təhlükə yaranarsa, o zaman hərbi doktrinamızı dəyişməkdən başqa çarəmiz qalmayacaq”, – Xarazi Qətərin ” Əl-Cəzirə” telekanalına müsahibəsində deyib . Onun sözləri kanalın portalında yer alıb.
Aprelin 18-də İran İslam İnqilabı Keşikçiləri Korpusu bildirib ki, əgər İsrail İslam Respublikasının nüvə obyektlərinə hücumla hədələsə, İran öz nüvə doktrinasına yenidən baxmağa hazırdır. Eyni zamanda, ölkədə nüvə silahı istehsalının İslam dininə zidd olması ilə bağlı ruhani liderin fətvası (teoloji nəticə) var. İran siyasətçiləri bu fətvanı Tehranın nüvə proqramının sırf dinc xarakterli olmasının arqumenti kimi göstərirlər. (Tass)
