İran nüvə proqramı üzrə danışıqları davam etdirməyə hazırdır, lakin ABŞ yaranmış böhranın sülh yolu ilə həllində səmimi maraq nümayiş etdirməlidir. Bunu İranın xarici işlər naziri Abbas Əraqçi Britaniyanın “Financial Times” qəzetindəki məqaləsində yazıb.
“İran hələ də diplomatiyada maraqlıdır, lakin gələcək dialoqa şübhə etmək üçün yaxşı səbəblərimiz var. Əgər bu problemi sülh yolu ilə həll etmək istəyi varsa, o zaman ABŞ ədalətli razılaşma əldə etmək üçün səmimi iradə nümayiş etdirməlidir. Vaşinqton da bilməlidir ki, onun son həftələrdəki hərəkətləri dəyişiklik yaradıb”.
Əraqçi deyib ki, “bir dəfə aldanan İran indi ikiqat ehtiyatlı davranır”. “Tammiqyaslı regional müharibədən qaçmaq üçün məsuliyyətlə hərəkət etmək öhdəliyimiz zəiflik kimi qəbul edilməməlidir. Biz xalqımıza qarşı gələcək hər hansı hücumu dəf edəcəyik. Və əgər o gün gələcəksə, İranın gücü ilə bağlı hər hansı illüziyaları dağıtmaq üçün real imkanlarımızı göstərəcəyik”, – nazir vurğulayıb.