İran hakimiyyəti Tehranın nüvə proqramına nəzarət tədbirlərini müzakirə etməyə hazırdır. Bunu İran prezidenti Məsud Pezeşkian amerikalı jurnalist Taker Karlsona müsahibəsində deyib.
“Nüvə proqramımıza nəzarət və ya nəzarətlə bağlı sualınıza cavab vermək üçün demək istərdim ki, biz bu barədə danışıqlara hazırıq. Biz heç vaxt yoxlamadan qaçan tərəf olmamışıq. Biz bu nəzarətə hazırıq”, – prezident İranın Beynəlxalq Atom Enerjisi Agentliyi (MAQATE) ilə əməkdaşlığına xitam verilməsini şərh etmək xahişini cavablandırarkən vurğulayıb.
“Lakin təəssüf ki, ABŞ-ın bizim nüvə mərkəzlərimizə və obyektlərimizə qeyri-qanuni hücumları nəticəsində bir çox avadanlıq və qurğulara ciddi ziyan dəyib. Ona görə də bizim onlara çıxışımız yoxdur”, – Pezeşkian bildirib. Onun sözlərinə görə, gözləmək, dəymiş ziyanı qiymətləndirmək lazımdır ki, nüvə proqramına nəzarəti təmin etmək mümkün olsun.