İran mətbuatı HƏMAS lideri İsmayıl Haniyənin İnqilab Keşikçiləri Korpusuna aid bir müəssisədə qaldığı zaman havadan atılan raketlə hədəf alındığını yazarkən, bu məlumat sui-qəsdlə bağlı beyinlərdə iki sual yaradıb. Birincisi, İsrail Haniyənin qaldığı şəxsi iqamətgahın yerini haradan bildi? İkincisi, döyüş təyyarəsi və ya pilotsuz təyyarə İsraildən havaya qalxıb, İordaniyadan, Suriyadan keçib, İraq səmasından hücum edib?
İranın paytaxtı Tehrana prezident Məsud Pezeşkianın andiçmə mərasimi üçün gedən Həmas lideri İsmayıl Haniyə öz iqamətgahında qətlə yetirilib.
İran mətbuatında əks olunan ilk təfərrüatlara görə, Haniyə və HƏMAS heyəti Tehranın şimalında İnqilab Keşikçiləri Korpusuna aid binada qalırmış. “Fars” xəbər agentliyinin verdiyi məlumata görə, mehmanxana havadan atılan raketlə vurulub.
İsrail ötən illərdə dəfələrlə Suriyanı hava hücumları ilə vurub və bu hücumların əksəriyyəti Livan hava məkanından və ya Aralıq dənizi üzərindən atılan raketlərlə həyata keçirilib. İsrail döyüş təyyarəsinin və ya silahlı pilotsuz uçuş aparatının İran hava məkanına daxil olması və sui-qəsdi həyata keçirməsi ehtimalı Tehran administrasiyası üçün daha böyük təhlükəsizlik zəifliyi kimi qeyd olunacaq.