İran Fələstin radikal HƏMAS hərəkatının Siyasi Bürosunun rəhbəri İsmayıl Haniyənin qətlinə görə, o cümlədən yəhudi dövlətinə qarşı sanksiyaların tətbiqi ilə bağlı İsraili məsuliyyətə cəlb etmək üçün Təhlükəsizlik Şurasının təcili addımlar atacağını gözləyir. Bu barədə İranın BMT-dəki daimi nümayəndəsi Əmir Səid İrəvani dünya təşkilatının Təhlükəsizlik Şurasının fövqəladə iclasında bildirib.
“Təhlükəsizlik Şurası İsrailin bu əməlinə görə məsuliyyət daşıması üçün təcili addımlar atmalıdır. Ümid edirik ki, bu, sanksiyaların tətbiqi və zəruri olan digər tədbirlərlə həyata keçiriləcək”, – o vurğulayıb.
Diplomat həmçinin qeyd edib ki, İranın İsraili günahlandırdığı HƏMAS Siyasi Bürosunun rəhbərinin qətli ABŞ kəşfiyyatının köməyi olmadan həyata keçirilə bilməzdi.
O, əlavə edib ki, BMT Təhlükəsizlik Şurasının KİV üçün Rusiya Federasiyası tərəfindən təklif edilən və İsraili Haniyyənin qətlinə görə qınayan bəyanat layihəsi Britaniya, Fransa və ABŞ tərəfindən bloklanıb. (Tass)