İran hökuməti ABŞ-ın yeni seçilmiş prezidenti Donald Trampın administrasiyası ilə dialoq qurmağa hazırdır. Bunu İslam Respublikasının strateji məsələlər üzrə vitse-prezidenti Məhəmməd Cavad Zərif deyib.
“Qərb ölkələri İrana təzyiq etmək əvəzinə müsbət addımlar atmalıdırlar. Nüvə sazişi [belə tədbirlərin] unikal nümunəsi idi və Qərb onu canlandırmaq üçün səy göstərməlidir. Onun bərpasına nail olmaq üçün konkret əməli tədbirlər görməyə doğru getməlidir. İranın faydalanacağı siyasi, hüquqi və investisiya qərarları da daxil olmaqla, Tramp belə addımlar atmağa qərar verərsə, İran həm Tehran, həm də Vaşinqtonun xeyrinə olacaq dialoqa hazır olacaq”, – Zərif “ Foreign Affairs” jurnalı üçün köşə yazısında yazıb.
İran rəsmisinin sözlərinə görə, “20 ildən çox davam edən iqtisadi sanksiyalardan sonra ABŞ və onun Qərb müttəfiqləri İranın onların təzyiqlərinə boyun əymədiyini, məcburiyyət tədbirləri ardıcıl olaraq əks nəticə verdiyini qəbul etməlidir”. Zərif xatırladıb ki, ABŞ-ın İrana maksimum təzyiq siyasətinə cavab olaraq İslam Respublikası uranın zənginləşdirilməsi sürətini artırıb və Beynəlxalq Atom Enerjisi Agentliyi müfəttişlərinin öz nüvə obyektlərinə çıxışını azaldıb.
Zərif qeyd edib ki, İran prezidenti Məsud Pezeşkian “Yaxın Şərqdə sabitlik və iqtisadi inkişafa, qonşu ərəb ölkələri ilə əməkdaşlığa və İranın müttəfiqləri ilə əlaqələrin gücləndirilməsinə çalışır, lakin eyni zamanda Qərblə konstruktiv qarşılıqlı fəaliyyət istəyir”. Pezeşkian hökuməti “ABŞ ilə gərginliyi həll etməyə hazırdır” və “nüvə sazişi üzrə bərabərhüquqlu danışıqlara və bəlkə də daha çox şeyə ümid edir”, – deyə siyasətçi əlavə edib. (Tass)