İsveçdə 2019-cu ildən qanunsuz olaraq sosial müavinət almaqda şübhəli bilinən İraqın keçmiş müdafiə naziri Nəcah əl-Şəmari paytaxtın Arlanda hava limanında saxlanılıb. Bu barədə TV4 telekanalı məlumat yayıb .
“O, axtarışdadır, demək olar ki, bir il yarımdır ki, qiyabi həbs olunub” deyən prokuror Yens Nilsson izah edib: “O, dünən saxlanılıb. Bu, İsveçə gələndə idi”.
57 yaşlı Nəcah əl-Şəmari 2019-2020-ci illərdə İraqın müdafiə naziri olub. O, eyni vaxtda İraq dövlətindən maaş və İsveçdə müavinət alıb.
2023-cü ilin yazında əl-Şamari İsveç Vergi İdarəsi ilə əlaqə saxlayıb və İsveçə qayıtdığını elan edib. Teleqraf.com TV4-ə istinadən xəbər verir ki, o, geri qayıdan şəxs kimi qeydə alınıb, lakin Stokholm polisi onu tapa bilməyib
2019-cu ilin noyabrında İsveç polisi İsveç pasportuna malik olan və krallıqda başqa adla yaşayan İraqın keçmiş müdafiə naziri Nəcah əl-Şamariyə qarşı dələduzluqda şübhəli bilinərək iş açıb. İsveç mətbuatının daha əvvəl xəbər verdiyi kimi, o, Stokholmun ətraf rayonlarından birində qeydiyyatda olub, 2009-cu ildə yaşayış icazəsi üçün müraciət edib və 2015-ci ildə İsveç pasportu alıb. İsveçdə daimi yaşamayan əl-Şamari və həyat yoldaşı krallıqda özləri və uşaqları üçün aylıq 9,4 min kron (1 min dollar) məbləğində müavinət alıblar.
(Tass)