İnnovasiya və Rəqəmsal İnkişaf Agentliyinin (İRİA) rəhbər heyətinin Türkiyə Respublikasına səfəri çərçivəsində ölkənin İKT qurumları və qabaqcıl texnologiya şirkətləri ilə məhsuldar görüşlər keçirilir.
Agentlikdən AZƏRTAC-a bildirilib ki, ilk görüş Türkiyənin Kommunikasiya Texnologiyaları Qrupu ilə keçirilib. Tədbirdə çıxışları zamanı qurum rəhbərləri Türkiyənin İKT şirkətlərinin Azərbaycanla rəqəmsal inkişaf yönündə təcrübə mübadiləsi və ortaq məqsədlərə nail olmaq üçün səylərin gücləndirilməsində əminlik ifadə ediblər.
Digər önəmli görüş Türkiyənin Proqram Təminatı İstehsalçıları Assosiasiyası (YASAD) ilə keçirilib. Tədbirdə çıxış edən İRİA-nın sədr əvəzi İnarə Vəliyeva bu görüşlər nəticəsində reallaşan layihələrin artan xətlə inkişaf edən Azərbaycan-Türkiyə münasibətlərinin İKT istiqamətinə əhəmiyyətli töhfə verəcəyini bildirib.
Türkiyə Xidmət İxracatçıları Assosiasiyası (HİB) ilə keçirilən görüşdə innovasiyayönümlü elmi tədqiqatların və innovativ layihələrin qarşılıqlı dəstəyi, investisiyaların artırılması, rəqəmsal inkişaf sahəsində təcrübə mübadiləsi, beynəlxalq tədbirlərdə ortaq əməkdaşlıq imkanları geniş dəyərləndirilib.