İsrail təhlükəsizlik qüvvələri İordan çayının qərb sahilində və İordaniya vadisində gecə boyu keçirdiyi reydlər zamanı 9 nəfəri saxlayıb. Bu barədə ordunun mətbuat xidməti məlumat yayıb.
Onun sözlərinə görə, reydlər ordu, sərhəd polisi və Baş Təhlükəsizlik Xidməti (əks-kəşfiyyat) tərəfindən birgə həyata keçirilib. Saxlanılanlar terror fəaliyyətində iştirakda şübhəli bilinirlər.
Bir neçə həbs zamanı şübhəlilərdən silah-sursat götürülüb. Saxlanılanların hamısı və onlardan götürülən silahlar əlavə araşdırmaların aparılması üçün təhlükəsizlik orqanlarına təhvil verilib. Mətbuat xidməti qeyd edib ki, bu reydlər zamanı İsrail tərəfdən itkilər barədə məlumat yoxdur.
İsrail ordusunun məlumatına görə, ümumilikdə, ötən il oktyabrın 7-dən İordan çayının qərb sahilində və İordaniya vadisində 3,8 mindən çox insan terrorda iştirakda şübhəli bilinərək saxlanılıb. Onlardan 1,6 mindən çoxu Fələstinin radikal HƏMAS hərəkatı ilə əlaqədə şübhəli bilinir. (Tass)