İsrail Hərbi Hava Qüvvələrinin qırıcıları Livanın cənubunun qərb sektorunda şiə Hizbullah partiyasının silahlı birləşmələrinin mövqelərinə hücum edib.
Lebanon 24 xəbər portalının verdiyi məlumata görə , zərbələr Əl-Ləbbun dağlıq bölgəsində və Alma əş-Şaab və Əd-Duheyra yaşayış məntəqələri yaxınlığında şiə yaraqlılarının postlarına endirilib.
İsrail artilleriyası Vazzani çayı vadisini atəşə tutub, oradan şimal yaşayış məntəqələrinə doğru raketlər atılıb. Sakinlər tərəfindən tərk edilmiş Məcdəl Zun və Tair Xarfa kəndləri də atəşə tutulub. Bu hücumların nəticələri barədə məlumat verilmir.
Hizbullahın hərbi informasiya xidməti daha əvvəl öz teleqram kanalında şiə döyüşçülərinin sərhəd bölgələrində İsrail hərbi obyektlərini minaatanlardan atəşə tutduqlarını bildirmişdi. Açıqlamada bildirilir ki, kamikadze pilotsuz uçan aparat Liman qəsəbəsində İsrail ordusunun komandanlıq məntəqəsinə hücum edib. “Düşmən hədəfi vuruldu, düşmən itki verdi”, mətndə deyilir. (Tass)
