Fələstinin HƏMAS hərəkatının yaraqlıları bütün girovları azad etməsə və silahlarını yerə qoymasa, İsrail Silahlı Qüvvələrinin Qəzza zolağında quru əməliyyatı demək olar ki, qaçılmazdır. Ehtiyatda olan İsrail Müdafiə Qüvvələrinin (IDF) sözçüsü Conatan Konrikus bu barədə Avstraliyanın ABC radiostansiyasına açıqlama verib.
Onun sözlərinə görə, İsrail ordusunun Qəzzada quru əməliyyatı “hazırkı vəziyyət davam edərsə, faktiki olaraq qaçılmazdır”. “Məqsədimiz HƏMAS-ı hərbi potensialından tamamilə məhrum etməkdir. Əgər HƏMAS [döyüşçülər] gizləndikləri yerlərdən çıxsa, girovlarımızı, 212 nəfərin hamısını geri qaytarsa və qeyd-şərtsiz təslim olsa, o zaman müharibə bitərdi. Lakin bunu etməyəcəklər” deyən o, İsrail ordusunun Qəzzada “quru əməliyyatı keçirməli” olduğunu qeyd edib.
CNN əvvəllər Vaşinqtonun İsrailə təzyiq etdiyini, onu Qəzzada quru əməliyyatının başlanmasını təxirə salmağa və anklavda saxlanılan girovları azad etməyə çağırdığını bildirmişdi. Bununla belə, ABŞ dövlət katibi Antoni Blinken NBC telekanalının efirində deyib ki, İsrail quru əməliyyatının başlaması ilə bağlı müstəqil qərar verməlidir, Vaşinqton yalnız məsləhət verə bilər. (Tass)
