İsrail təhlükəsizlik qüvvələri İordan çayının qərb sahilindəki Cenin və Balata fələstinli qaçqın düşərgələrində anti-terror əməliyyatları keçirərək, axtarışda olan 20-yə yaxın şübhəlini saxlayıb və partlayıcı qurğuların anbarları, partlayıcı maddələr laboratoriyası və radikalların 5 müşahidə məntəqəsi aşkar ediblər. Bu barədə İsrail Müdafiə Qüvvələrinin mətbuat xidməti məlumat yayıb.
“Gecə təhlükəsizlik qüvvələri bütün Yəhudeya və Samariyada (İsrailin İordan çayının qərb sahili üçün təyinatı – TASS qeydi) əməliyyat keçirib və axtarışda olan 38 şəxsi saxlayıb. Eyni zamanda Cenin qaçqın düşərgəsindəki terrorçuların istehkamlarında iki briqada əməliyyatı başa çatıb. Cenin və Nablus şəhərindəki Balata qaçqın düşərgəsində 10-dan çox silah müsadirə edilib, axtarışda olan 20-yə yaxın şübhəli həbs edilib, əldəqayırma partlayıcı qurğuların anbarları, partlayıcı maddələr laboratoriyası və dörd müşahidə məntəqəsi aşkar edilib. Cenindəki qaçqın düşərgəsində təhlükəsizlik qüvvələri məscidə bitişik, əldəqayırma partlayıcı qurğular olan anbar aşkar edərək məhv edib”, – deyə məlumatda bildirilir.
Mətbuat xidməti əlavə edib ki, İordan çayının qərb sahilində bir sıra bölgələrdə gecə reydləri zamanı “terrorçularla atışma olub” və onlar həqiqi güllələrlə cavab verən hərbçilərə “atış və partlayıcı maddələr atıblar”. “İsrail qüvvələri arasında itki yoxdur”, – hərbçilər əlavə edib. (Tass)