İsrail qüvvələri Qəzza zolağının şimalında bütün yaşayış məntəqələrini sökür və onların yerində hərbi istehkamlar qurur. Bu barədə The Washington Post məlumat yayıb.
Onun qeyd etdiyi kimi, mövcud peyk şəkilləri və videoları göstərir ki, “İsrail minlərlə fələstinlinin evlərini tərk etmək məcburiyyətində qaldığı Qəzzanın şimalında yaşayış məntəqələrində binaları kütləvi şəkildə dağıtır və hərbi istehkamlar tikir”. BMT-nin məlumatına görə, son 11 həftə ərzində 100 mindən çox fələstinli bölgəni tərk edib. Nəşrin əldə etdiyi peyk görüntüləri göstərir ki, “fələstinlilər əraziləri tərk edərkən İsrail qüvvələri bütün məhəllələri dağıdıb, hərbi istehkamlar yaradıb və yeni yollar salıb”.
Nəşr qeyd edir ki, Qəzza zolağının şimal hissəsinin 10 sakini qəzetin müxbirlərinə “İsrail qüvvələrinin yaşayış məntəqələrinə genişmiqyaslı hücumları” barədə danışıb. Onlar həmçinin İsrail tərəfinin “kişilərin və yeniyetmə oğlanların qadın və uşaqlardan ayrıldığı təhlükəli kütləvi təxliyələr” həyata keçirdiyini və bəzi sakinlərin “sui-istifadə və əsassız həbslərə” məruz qaldığını bildiriblər. (Tass)