Rusiya prezidenti Vladimir Putinlə İsrailin baş naziri Benyamin Netanyahu arasında telefon danışığı çox önəmlidir. Bu, iki ölkə arasında münasibətlərin nə qədər möhkəm olduğunu nümayiş etdirir, İsrailin Moskvadakı səfiri Simona Qalperin “İzvestiya”ya şərhində bildirib .
“Düşünürəm ki, yalnız onların müzakirə edə biləcəyi vacib məsələlər olanda liderlərin birbaşa danışa bilməsi çox vacibdir. Bu onu göstərir ki, hər iki tərəf təşəbbüs göstərə bilər və bu təşəbbüs qarşı tərəf tərəfindən qəbul edilir. Bu, münasibətlərin nə qədər möhkəm olduğunun mühüm göstəricisidir”, – diplomat vurğulayıb.
O qeyd edib ki, İsrail və Rusiya digər məsələlərlə yanaşı, İranın nüvə problemi ilə bağlı məsələləri də müzakirə edirlər. “Ölkələr təmasdadır. Mən artıq bir il yarımdır ki, Yaxın Şərqdəki vəziyyətlə bağlı məsələlərdə ciddi iştirak edirəm və təbii ki, İran dosyesi bizim masamızda duran əsas və vacib məsələlərdən biridir”, – Qalperin əlavə edib.
Bir gün əvvəl Rusiya liderinin mətbuat katibi Dmitri Peskov Putinlə İsrailin baş naziri arasında telefon danışığı barədə məlumat vermişdi. Tərəflər arasında əvvəlki söhbət iyulun 28-də baş tutub.