İsrail hərbçiləri İordan çayının qərb sahilinin şimalında gecə saatlarında başlayan əməliyyat zamanı 3 silahlı radikalı məhv edib və 18 fələstinlini terror fəaliyyətlərində iştirakda şübhəli bilinərək həbs edib. Bu barədə İsrail Müdafiə Qüvvələrinin (IDF) mətbuat xidməti məlumat yayıb.
Onun məlumatına görə, İordan çayının qərb sahilinin şimalında Nablus şəhəri yaxınlığındakı Talusa kəndində silahlı radikallarla atışma zamanı bir İsrail əsgəri ağır yaralanıb. “Hərbçi sonrakı müalicə üçün xəstəxanaya təxliyə edilib”, – mətbuat xidmətinin məlumatında deyilir.
Yanvarın 6-da İsrailin baş naziri Benyamin Netanyahu Kdumim yaşayış məntəqəsi yaxınlığındakı magistral yolda naməlum şəxslər tərəfindən üç israillinin öldürülməsindən sonra İordan çayının qərb sahilində vəziyyətin qiymətləndirilməsi ilə bağlı keçirilən iclasın yekunları üzrə bir sıra əlavə müdafiə və hücum tədbirlərini təsdiqləyib. Bazar ertəsi İordan çayının qərb sahilində yəhudilərin məskunlaşdığı Kdumim qəsəbəsi yaxınlığında şossedə avtobus və avtomobillərə atəş açılaraq üç israilli həlak olub. (Tass)
