İsrail Ukraynaya qeyri-hərbi yardımın bir hissəsi olaraq nüvə təhlükəsizliyi ilə bağlı avadanlıqları Kiyevə ötürüb. Bu barədə İsrailin Atom Enerjisi Komissiyasının rəhbəri Moşe Edri MAQATE Baş Konfransının 67-ci sessiyasında çıxışı zamanı bildirib.
O, çıxışında yəhudi dövlətinin MAQATE-nin məqsəd və vəzifələrini tam dəstəklədiyini və agentliklə fəal əməkdaşlıq etdiyini vurğulayıb. “İsrail agentliyin əsas təşəbbüsləri və iş sahələrində fəal iştirakçıdır. Bu il İsrail MAQATE-nin baş direktorunun “Ümid şüaları” təşəbbüsünə mühüm töhfə verib, həmçinin yardım haqqında konvensiyaya İsrailin öhdəliyinin bir hissəsi kimi Ukraynaya avadanlıq bağışlayıb”, – deyə o bildirib.
İsrail rəsmisi həmçinin Ukraynadakı hadisələr fonunda nüvə təhlükəsizliyi məsələləri ilə bağlı qlobal səviyyədə geniş müzakirələrin aparılmasının tərəfdarı olduğunu bildirib. “Ukraynadakı müharibə nüvə təhlükəsizliyi ilə bağlı qlobal müzakirələrə əvvəlkindən daha çox ehtiyac olduğunu göstərir, çünki hamımızın bildiyimiz kimi, nüvə təhlükəsizliyi ilə bağlı risklərin sərhədləri yoxdur”, – Edri bildirib. (Tass)
