İsrail Qəzza zolağının Misirlə sərhədində yerləşən Rəfah şəhərinə qoşun yeritməyi qaçılmaz hesab edir. Yəhudi dövlətinin müdafiə naziri Yoav Qalant bu barədə amerikalı həmkarı Lloyd Ostinə telefon danışığında bildirib.
İsrail Müdafiə Nazirliyinin mətbuat xidmətinin məlumatına görə, Qalantin Ostinlə söhbəti gecə saatlarında baş tutub, israilli nazir həmsöhbətinə Fələstin anklavı ilə sərhəddə Kerem Şalom keçid məntəqəsinin ətrafının atəşə tutulması barədə məlumat verib.
“Onların söhbəti zamanı nazir Qalant girovların azad edilməsi üçün göstərilən səyləri müzakirə edib və bildirib ki, hazırkı mərhələdə Fələstin radikal HƏMAS hərakatı təklif olunan sazişi rədd edir. Nazir Qalant hərbi əməliyyatların zəruri olduğunu və alternativ variant olmadığı üçün Rəfah bölgəsində əməlliyat aparmağa məcbur olduğunu deyib”, – məlumatda deyilir.
İsrail tərəfinin bildirdiyinə görə, HƏMAS İsrail istiqamətində hücumlarını davam etdirir və eyni zamanda, Qəzza zolağında girovların azad edilməsini nəzərdə tutan danışıqlarda təqdim olunan saziş layihələri ilə bağlı “ciddi yanaşma” nümayiş etdirir. “İsrail dövləti öz sərhədlərində terror strukturlarının davamlı olmasına dözməyəcək və müharibənin məqsədlərinə nail olmaq öhdəliyinə sadiqdir: hərbi və hökumət orqanı kimi HƏMAS-ın məhv edilməsi və 132 girovun qaytarılması”, – Müdafiə Nazirliyi bildirib. (Tass)