İsrailin Qəzza zolağında son 24 saat ərzində həyata keçirdiyi bomba və zərbələr nəticəsində azı 34 fələstinli ölüb, çoxlu sayda fələstinli yaralanıb. Bu barədə Fələstinin WAFA xəbər agentliyi məlumat yayıb.
Onun sözlərinə görə, Qəzza zolağının mərkəzi hissəsində Nuseyrat qaçqın düşərgəsində yaşayış binasına endirilən aviazərbə nəticəsində 3 mülki şəxs həlak olub, daha bir neçəsi yaralanıb. İsrailə məxsus pilotsuz uçan aparat Qəzza şəhərinin Əl-Tuffa bölgəsində bir evə zərbə endirib, iki yerli sakin həlak olub. İşğalçı qüvvələrin Qəzza şəhərinin Əl-Dərəc və Şeyx Radvan məhəllələrini bombaladığı, qırıcıların isə Qəzza zolağının cənubundakı Rəfah şəhərinin qərbində və şimalındakı Beyt Hanun şəhərinin şərq kənarında yerləşən ərazilərə reydlər keçirdiyi bildirilir. Eyni zamanda, İsrail artilleriyası zolağın şimal hissəsində Cəbəliyyənin şərq hissəsini, anklavın mərkəzindəki Cuhr əl-Dik ərazisini və Qəzza şəhərinin cənub ətrafını atəşə tutub. (Tass)