İsrailin Qəzza zolağında həyata keçirdiyi əməliyyatın məqsədləri qalan girovların azad edilməsi, həmçinin HƏMAS-ın hakimiyyətdən tamamilə məhrum edilməsi və hərbi potensialının aradan qaldırılmasıdır. Bunu TASS-a müsahibəsində İsrailin Moskvadakı səfiri Simone Halperin deyib.
“Hamımız ümid edirik ki, HƏMAS öz üzərinə götürdüyü öhdəlikləri yerinə yetirəcək və bütün girovlarımız evlərinə qayıdacaqlar. Orada daha 90-dan çox insan var. Beləliklə, ümid edirik ki, birinci məqsəd əldə olunacaq – bütün girovlar geri qayıdacaqlar”deyib.
Halperin qeyd edib ki, yanvarın 19-da anklavda atəşkəs razılaşmasına əsasən ilk üç İsrail vətəndaşının azad edilməsi xəbərindən çox məmnundur. “Onların BMT-nin humanitar çadır kompleksinin ərazisində saxlandığını biləndə hamımız dəhşətə gəldik”, – səfir əlavə edib. Onun sözlərinə görə, bu vəziyyət “Həmas”ın “BMT-nin Fələstinli Qaçqınlara Yardım və İşlər üzrə Yaxın Şərq Agentliyinə (UNRWA) nə qədər dərindən nüfuz etdiyini” göstərir.
Diplomat qeyd edib ki, söhbət mülki şəxslərin, o cümlədən uşaqların, qadınların və qocaların xilas edilməsindən gedir. “Onların bəziləri yaralanıb, bəziləri isə əsirlikdə öldürülüb”, o vurğulayıb. (Tass)