İsrail ordusunun əsgərləri Suriya ilə sərhəddəki bufer zonada həyata keçirilən əməliyyat çərçivəsində 1973-cü ildən bəri ilk dəfə olaraq qonşu dövlətin nəzarətində olan əraziyə daxil olub. “The New York Times ” (NYT) adının açıqlanmayan İsrail rəsmilərinə istinadən xəbər verir ki, bu, yəhudi dövlətinin xarici siyasətində əhəmiyyətli dəyişiklik olduğunu göstərir.
Dekabrın 8-də İsrail Müdafiə Qüvvələri öz qüvvələrini Suriya ilə sərhəddəki bufer zonaya yerləşdirdiyini rəsmən elan edib. Konkret olaraq, İsrail qüvvələri Qolan təpələrində Hermon dağ silsiləsinin Suriya tərəfində demarkasiya zonasından kənarda əlavə təhlükəsizlik zonası yaradır.
Qəzetin qeyd etdiyi kimi, dekabrın 8-də İsrail Ordusunun Baş Qərargah rəisi Herzi Halevinin İsrailin “Suriya ərazisinə qoşun yeritməsi” ilə bağlı açıqlaması İsrail ordusunun bufer zonadan kənara çıxdığını təsdiqləyir. “Suriyada hərbisizləşdirilmiş zonadan kənarda qoşunların yerləşdirilməsi [İsrailin] siyasətində əhəmiyyətli dəyişiklikdir, çünki bu, İsrail və Suriya arasında müharibəyə son qoyan 1974-cü il atəşkəs razılaşmasından sonra İsrail qüvvələrinin Suriya ərazisinə ilk müdaxiləsidir”, – qəzet yazır.