Türkiyə polisi və kəşfiyyatçıları İstanbulda İsrail kəşfiyyat xidməti Mossad-ın maraqlarına xidmət etməkdə şübhəli bilinən 7 nəfəri saxlayıb. Bu barədə TRT telekanalı məlumat yayıb.
Reydlər daha əvvəl şəhərdə polislə Türkiyə Milli Kəşfiyyat Təşkilatının birgə əməliyyatı çərçivəsində həyata keçirilib. Saxlanılanların Mossad-a məlumat satdıqları qeyd edilir.
Onların arasında vaxtaşırı yerli telekanalların səhər verilişlərinə dəvət olunan keçmiş məmur, özəl detektiv Həmzə Turhan Ayberk də var. İstintaq müəyyən edib ki, o, İsrail kəşfiyyatını pul müqabilində məlumat, o cümlədən Yaxın Şərqdən olan şəxslərin və Türkiyədəki şirkətlərin fəaliyyəti ilə bağlı məlumatlarla təmin edib. O, xüsusi müşahidə avadanlığının köməyi ilə onların bəzilərinə nəzarət edib və məlumatları operativ şəkildə Mossad-a ötürüb. Ayberkin bu iş üçün 2019-cu ildə Belqradda təlim keçdiyi də aydınlaşıb.
İlin əvvəlində Türkiyə əks-kəşfiyyatı nəticəsində 34 nəfər İsrail kəşfiyyat xidməti Mossad-da Türkiyədə işləməkdə şübhəli bilinərək saxlanılıb. “Hürriyet” qəzeti qeyd edib ki, İsrail Türkiyəyə qarşı casus müharibəsinə başlayıb, lakin bunun nəticələrini xatırlamalıdır.