Azərbaycanın Səudiyyə Ərəbistanındakı səfiri Şahin Abdullayevin Körfəz Əməkdaşlıq Şurasının (KƏŞ) Baş katibi Casim Məhəmməd əl-Budeyvi ilə görüşündə Şuraya üzv ölkələr ilə Azərbaycan arasında əməkdaşlığın perspektivləri müzakirə olunub.
AZƏRTAC Şuranın mətbuat üçün açıqlamasına istinadla xəbər verir ki, Casim Məhəmməd əl-Budeyvi bu ilin noyabrında Bakıda SPECA-nın Zirvə görüşündə iştirakı zamanı Azərbaycan Prezidenti İlham Əliyevlə görüşü əsnasında aparılan fikir mübadiləsini böyük məmnunluqla xatırlayıb. O, Körfəz Əməkdaşlıq Şurasına üzv ölkələrin Azərbaycan ilə əlaqələrin hərtərəfli inkişafına böyük əhəmiyyət verdiyini qeyd edib, həmçinin siyasi, iqtisadi, investisiyaların artırılması və digər istiqamətlərdə böyük perspektivlərin olduğunu vurğulayıb.
Görüş zamanı 2023-cü ilin noyabrında qəbul edilmiş Körfəz Əməkdaşlıq Şurası ilə Azərbaycan Respublikası arasında 2024-2028-ci illər üçün birgə Fəaliyyət Planının həyata keçirilməsi üzrə addımlar müzakirə edilib. İki maraqlı tərəfin işçi qrupunun hazırladığı bu plan siyasi koordinasiya, qarşılıqlı investisiyalar və ticari əməkdaşlıq kimi ümumi maraq kəsb edən bir çox sahələri əhatə edir.