Yaponiyanın baş naziri Fumio Kişida Şimali Koreya lideri Kim Çen Inla şəxsən görüşməyə və Tokio ilə Pxenyan arasında münasibətlərin normallaşdırılması yollarını müzakirə etməyə hazır olduğunu bildirib.
“Oğurlanmış bütün Yaponiya vətəndaşlarının tezliklə geri qaytarılması, Yaponiya-Şimali Koreya münasibətlərini yeni səviyyəyə çıxarmaq, habelə Şimali Koreya ilə mövcud problemləri həll etmək üçün sədr Kim Çen In ilə sammitin keçirilməsi zəruridir” o, parlamentin aşağı palatasının plenar iclasında əsas nitqlə çıxış edərkən deyib. Kişida Yaponiya-KXDR sammitinə hazırlıqla bağlı yüksək səviyyəli məsləhətləşmələrə şəxsən nəzarət edəcəyini vurğulayıb.
Yaponiya hökumətinin başçısı Yaponiya ilə KXDR arasında münasibətlərin normallaşmasının regionda sülhün və sabitliyin təmin olunmasına böyük töhfə verəcəyinə əminliyini ifadə edib.
Kişida da son illərdəki sələfləri kimi Şimali Koreya kəşfiyyatı tərəfindən oğurlanmış Yaponiya vətəndaşlarının problemini həll etmək üçün Kim Çen Inla şəxsən görüşməyə hazır olduğunu dəfələrlə bəyan edib. (Tass)
