Yasamal rayon Mərkəzləşdirilmiş Kitabxana Sisteminin M.Ş.Vazeh adına Yasamal rayon Mərkəzi Kitabxanasının fəxri oxucusu, yazıçı-publisist Sevinc Ağa Xəlilqızının “Ön cəbhə əfsanələri…” kitabı işıq üzü görüb. Kitab M.Ş.Vazeh adına Mərkəzi Kitabxananın “Şəhidlər ölməz, Vətən bölünməz”, “Şəhidlər unudulmur” və “Yaradıcı oxucularımız” layihələri çərçivəsində çap olunub.
Kitabxanadan AZƏRTAC-a bildirilib ki, kitabda müəllif Azərbaycanın, onun qəhrəman əsgər və zabitlərinin gücünü, qüdrətini göstərməyə çalışıb. Həmçinin 44 günlük Vətən müharibəsini, xalqımızın tarixin bu sınağından Zəfərlə çıxmasını, Vətənə sonsuz sevgisini təcəssüm etdirib. Yazıçı romanın baş qəhrəmanı Əmrulla Əliyevin həyat və döyüş yolunu izləyir. Kitaba şəhid Əmrulla Əliyevin yazdığı şeirlər də daxil edilib.
Kitab bir neçə kitabxanaya, şəhid ailələrinə, qazi və veteranlara hədiyyə edilib.