Ukrayna münaqişəsinin nizamlanması məsələsi üzrə Ukrayna və ABŞ nümayəndə heyətlərinin yeni görüşü gələn həftə baş tuta bilər. Bu barədə Vladimir Zelenski jurnalistlərlə görüşündə bildirib.
“Biz düşünürük ki, amerikalılarla görüşümüz gələn həftə baş tuta bilər”, – RBC-Ukrayna agentliyi onun sözlərindən sitat gətirir.
Martın 23-də Ər-Riyadda ABŞ və Ukrayna nümayəndə heyətləri arasında danışıqlar baş tutub. Martın 24-də Ər-Riyadda Rusiya və ABŞ nümayəndələrinin görüşü baş tutub. Martın 25-də Vaşinqton və Kiyev nümayəndə heyətləri Səudiyyə Ərəbistanının paytaxtında danışıqların yeni raundu keçirib. Ukrayna tərəfdən görüşlərdə müdafiə naziri Rustem Umerov, Zelenskinin ofisinin rəis müavini Pavlo Palisa, eləcə də silahlı qüvvələrin nümayəndələri və energetika mütəxəssisləri iştirak ediblər. Enerji obyektlərində 30 günlük atəşkəs rejiminin parametrləri, həmçinin Qara dənizdə gəmiçilik təhlükəsizliyi məsələləri müzakirə edilib. (Tass)