Ukrayna Çini öz “sülh formulu”na həsr olunmuş görüşlərə dəvət etməyə davam edəcək və Pekinin iştirakı Kiyev üçün vacibdir. Bunu Davosda milli təhlükəsizlik üzrə müşavirlərin Ukrayna təşəbbüsünə həsr olunmuş dördüncü iclasının yekunlarına dair mətbuat konfransında Ukrayna prezidentinin ofisinin rəhbəri Andrey Ermak deyib.
“Təəssüf ki, bu gün Çin təmsilçisi yoxdur. Biz [onları] dəvət etdik, dəvət etməyə davam edəcəyik. Çinin masa arxasında olması bizim üçün vacibdir”, – deyə o, gələcəkdə Pekinin bu cür görüşlərdə iştirak edəcəyinə ümid etdiyini bildirib.
2023-cü ildə Kiyevin bu təşəbbüsünə həsr olunmuş üç iclas keçirilib. Onlardan sonuncusu oktyabrın 28-29-da Maltada baş tutub, Çin orada iştirak etməyib. (Tass)