Azərbaycan xalqının böyük tarixi var. Dinə münasibətdə xalqımız həmişə tolerantlıq nümayiş etdirib. Azərbaycan ərazisində bir dəfə də olsun dini zəmində toqquşma görməmişik. Xalqımız ölkəmizdə yaşayan xalqların adət-ənənələrinə, dininə həmişə hörmətlə yanaşıb.
AZƏRTAC xəbər verir ki, bunu Dini Qurumlarla İş üzrə Dövlət Komitəsinin sədri Mübariz Qurbanlı “Heydər Əliyev irsi: tolerantlıq və multikultural dəyərlər” mövzusunda keçirilən konfransda bildirib.
Komitə sədri vurğulayıb ki, Ümummilli Lider Heydər Əliyev hələ 1969-cu ildə hakimiyyətə gələndə ölkə ərazisində dini abidələrin, məscidlərin qorunması üçün tapşırıqlar verdi.
“Bu, Ulu Öndərin tariximizə, milli-mənəvi, dini dəyərlərimizə verdiyi böyük dəyərin göstəricisi idi. Heydər Əliyev dini mənsubiyyətimizdə dünyəviliyi seçməklə doğru qərar verdi. Əgər dünyəviliyi seçməsəydik, bu, tarixən formalaşmış tolerantlıq ənənələrimizə ziyan vurardı”, – deyə M.Qurbanlı bildirib.
Çıxışında Ulu Öndərin xalqın yaddaşında əbədi olaraq yaşayacağını vurğulayan komitə sədri Azərbaycan xalqının Heydər Əliyev irəli getdiyini vurğulayıb. Qeyd edib ki, bu yolu onun davamçısı Prezident İlham Əliyev uğurla irəliyə aparmaqdadır.