Könüllülər Astara, Şəki və Ordubada gənclərə, xüsusən də 18 yaşına çatmış və Azərbaycan qanunvericiliyinə müvafiq olaraq ilk dəfə səsvermə hüququna sahib olan ölkə vətəndaşlarına seçki proseslərində iştirak, seçki sistemi, seçicinin hüquq və vəzifələri və fəal şəkildə səsvermə hüququndan istifadənin önəmi barədə infosessiyalar, təlimlər keçiblər.
“Report”un xəbərinə görə, bölgələrə səyyar avtobuslar vasitəsi ilə səfər edən seçki könüllüləri rayonlarda yaşayan gəncləri maarifləndirməyə davam edir.
Rayon və kəndlərdə yaşayan ölkə gənclərini fəal şəkildə səsvermə hüququndan istifadə etməyə və 7 fevral tarixinə təyin edilmiş növbədənkənar prezident seçkilərində iştiraka çağırış ediblər.
“Səs ver, Gələcəyini qoru!” şüarı ilə rayonlara yola düşən seçki könüllüləri qurulan platformalarda region gənclərini maarifləndirməklə yanaşı əyləncəli oyunlarda da iştirakını təmin edərək asudə vaxtın səmərəli təşkilinə də töhfə veriblər.
Qeyd edək ki, Gənclər Fondunun dəstəyi və Azərbaycan Könüllü Təşkilatları İttifaqının (AKTİ) təşkilatçılığı ilə icra edilən səyyar görüşlər ötən ilin 28 dekabr tarixindən başlayaraq Şirvan, Sabirabad, Şamaxı, Ağdaş, Ağcabədi, Mingəçevir, Gəncə, Cəlilabad, Naxçıvan, Masallı, Goranboy, Şərur, Qazax və Lənkəranda təşkil edilib.