Bunu “Report”a açıqlamasında noyabrın 22-də Laçın rayonuna qayıdan Rəşad Əsədov deyib.

O, ata-anasının rəhmətə getdiyini bildirib: “Düz 31 ildən sonra öz övladlarımla geri qayıdıram. Laçında əvvəlki evimin yerində yenisi tikilib. Allah şəhidlərimizə rəhmət eləsin”.

Digər sakin Nəsib Bayramov isə vurğulayıb ki, bu gün doğma torpaqlarına qayıtmağın böyük sevincini yaşayırlar: “Laçından didərgin düşəndə 25 yaşım var idi. İndi 56 yaşım, 31 il sonra doğma yurdumuza qayıdırıq. Çox böyük sevinci hissi keçirirəm. Laçın azad olunandan sonra işlə əlaqədar oraya tez-tez gedirdim. İndi isə artıq yurdumuza köçürəm. Arzu edirəm ki, bütün laçınlılar öz torpağına qayıtsın. Artıq məşğulluğum da təmin olunub. Allah şəhidlərimizə rəhmət eləsin, qazilərimizə şəfa diləyirəm. Allah Ali Baş Komandanımıza da cansağlığı versin”.

Xatırladaq ki, yenidən qurulan Laçın şəhərinə keçmiş məcburi köçkünlərin qayıdışı davam edir. Noyabrın 22-də növbəti köç karvanı Bakı şəhərinin Qaradağ rayonundakı “Qobu park 3” yaşayış kompleksindən yola salınıb.