Azərbaycan Rusiya Federasiyası ərazisində Ermənistanla sülh müqaviləsi imzalamağa hazırdır, lakin İrəvanın mövqeyi qeyri-müəyyən olaraq qalır. Bunu Rusiyanın xarici işlər naziri Sergey Lavrov 2023-cü ildə Rusiya diplomatiyasının yekunlarına dair mətbuat konfransında deyib.
“Qərbli həmkarlarımız istəyirlər ki, [Azərbaycan və Ermənistan arasında] sülh müqaviləsi yalnız onların ərazisində imzalansın, bu faktdır. Azərbaycanın Rusiya ərazisində onu imzalamağa hazır olması faktı, əslində, münaqişəni dayandırmaq üçün səylər göstərməsi və bütün məsələləri həll etmək üçün bütün qarşılıqlı fəaliyyət sistemlərini qurmaq, bu da faktdır.İrəvanın buna nə dərəcədə hazır olduğu mənə məlum deyil, baxmayaraq ki, müvafiq siqnallar Ermənistan paytaxtına çoxdan göndərilib”, – Lavrov bildirib.
O əlavə edib ki, ilkin olaraq Rusiya, Ermənistan və Azərbaycan arasında müqavilələr bağlanıb. Bu razılaşmalar həyata keçirilməyə başladıqdan sonra marşrutların blokdan çıxarılması və delimitasiyası mexanizmləri yaradıldı. “Məhz o zaman avropalılar və amerikalılar özlərini bu prosesə fəal şəkildə cəlb etməyə başladılar”, – Lavrov əlavə edib.
Ermənistan və Azərbaycan sülh müqaviləsi üzrə danışıqlar aparır. Ciddi maneələrdən biri də sərhədin ümumi hissəsinin demarkasiyası məsələsi idi. İrəvan təkid edir ki, 1991-ci il Alma-Ata Bəyannaməsi sərhədlərin delimitasiyası üçün siyasi əsas olmalıdır. Ermənistan hakimiyyətinin fikrincə, SSRİ Silahlı Qüvvələrinin Baş Qərargahının 1974-1990-cı illərdəki xəritələrindən istifadə edilməlidir. (Tass)