“Zəfərin kölgəsi” bir şəbəkə layihəsidir. Layihənin birinci sərgisi keçən il dekabrın 24-də Müzəffər Ali Baş Komandan İlham Əliyevin doğum gününə həsr etdiyim “Zəfərin kölgəsi – Vətən müharibəsi qəhrəmanları” sərgisi olub. Həmin sərgidə 83 nəfər Vətən Müharibəsi Qəhrəmanının ipək üzərində kölgə effektli portretləri nümayiş olunub. Portretlərin 34-ü şəhid qəhrəmanlarımızın ailələrinə, 49-u isə qəhrəmanların özlərinə təqdim edilib.
Bu barədə AZƏRTAC-ın bölgə müxbirinə “Zəfərin kölgəsi” layihəsinin rəhbəri Elmar Məmmədzadə məlumat verib.
Layihə rəhbəri bildirib ki, bu gün reallaşan “Zəfərin kölgəsi Şəki” sərgisi çərçivəsində isə 71 şəhidinin şüşə üzərində həkk edilmiş kölgə effektli portretləri nümayiş edilərək şəhidlərin ailə üzvlərinə təqdim olundu.
Elmar Məmmədzadənin sözlərinə görə, gələcəkdə “Zəfərin kölgəsi Qəbələ” və “Zəfərin kölgəsi Balakən” sərgilərinin də keçirilməsi planlaşdırılır. Hazırda sərgilərə hazırlıq gedir. İşlər tamamlandıqdan sonra həmin rayonlarda da silsilə tədbirlər davam etdiriləcək.